ان السبب الاشهر لاعوجاج العمود الفقري (الجنف) هو اعوجاج بدون سبب معروف و اسمه adolescent idiopathic scoliosis و ده بيصيب البنات اكتر و بيبدأ في الظهور في سن ما قبل البلوغ و المشكلة انه بيبدأ يزيد مع الوقت لحد سن البلوغ بمعدل سريع و كمان بيستمر في الزيادة بمعدل اقل شوية حتي بعد سن البلوغ لسنين طويلة بالذات لو درجة الاعوجاج كبيرة من البداية.

هل كل حالات الاعوجاج بتحتاج تدخل جراحي ؟

بالتأكيد لأ ، في حالات بيكون الاعوجاج بسيط جدا اقل من 20 درجة قرب سن البلوغ و ده بيحتاج يبقي تحت الملاحظة كل ست شهور لحين انتهاء النمو ، الاعوجاج الاكبر شوية في حدود ال 30-35 درجة بيحتاج انواع خاصة من الدعامات scoliosis braces و برضو لازم تكون في متابعة كل ست شهور ، اما الحالات اللي بيقترب فيها الاعوجاج من 40-45 درجة غالبا بيحتاجوا الي التدخل الجراحي مش بس لاصلاح شكل العمود الفقري و انما كمان لان وجود الاعوجاج حتي لو لم يسبب الم في فترة الطفولة الا انه بيسبب مضاعفات خطيرة في المستقبل , اضافة لان الابحاث في السيكولوجي اكدت ان الصورة الذاتية للانسان و رؤيته لنفسه بتتكون في السن ده و اي تشوه ممكن يؤثر سلبا علي التطور النفسي للانسان طول حياته.

في تدخلات جراحية متعددة لتصليح الاعوجاج و بتعتمد علي التصليح ثم التثبيت للجزء المصاب و الحفاظ علي الجزء السليم ،و دي عملية ممكن اجراءها الان علي مرحلة واحدة بدلا من مرحلتين كما كان في السابق و يتم فيها تثبيت الفقرات في الوضع الصحيح ليها بأفضل انواع وسائل التثبيت و المريض بعدها بيقدر يتحرك من السرير و يمشي في اليوم التالي و يقدر يرجع للحركة العادية ما عدا الرياضة و المجهود خلال شهر تقريبا و مع العلاج الطبيعي يقدر يرجع للرياضة خلال اشهر قليلة.